Екстрадицијата на Грујевски и Бошкоски повторно заглавена

Добивај вести на Viber

Неизвесно е кога ќе биде донесена конечна и правосилна одлука за екстрадиција на двајцата припадници на безбедносните служби на Македонија, затоа што ќе се решава најпрво за барањето за на Горан Грујевски и Никола Бошковски. 

Оваа процедура исто така е одложена на неопределено време, затоа што органот што ја води постапката нема преведувач од грчки на македонски јазик и обратно, изјави денес адвокатот Петар Василев пред Кривичниот суд по одложувањето на рочиштето за предметот „Таргет-Тврдина“.

Според него судовите и другите органи во Грција тешко се снаоѓаат со преведувачи на македонски јазик. Таков бил и проблемот како што објасни тој и во овој случај , бидејќи органот што ја води постапката за азил нема преведувач од грчки на македонски и обратно, па носењето на одлуката било одложено на неопределено време.

Според него, нема можност на Грујевски и на Бошковски да им се суди во Македонија за фалсификуваните патни исправи.

Тоа може да се случи само кога странките сами ќе побарат, но во овој случај не е така, нагласи Василев и додаде дека жалба за екстрадицијата е поднесена во судот во Атина, но се уште немаат добиено одговор.

На прашање дали во март Грујевски и Бошкоски ќе бидат екстрадирани од Грција во Македонија како што беше објавено претходно, Василев рече дека не би шпекулирал со рокови.

– Не би сакал да шпекулирам во однос на роковите, како што објавија некои медиуми. Таму се водат повеќе постапки за нив, да оставиме на судот и да видиме. Тоа се судски постапки. Никој на тие судски постапки не може да влијае. Судот определува кога ќе бидат закажани рочиштата и кога ќе биде донесена одлука. Од наша страна не може да постои никаков влијание, ниту пак би можеле да извршиме проценка кога би можело да се случи, појасни  тој.