Димитров од европарламентарците бара ветeр в грб, за возврат нуди плодна жетва
Објавено во: Македонија 10 Октомври, 2017
Министерот за надворешни работи на Република Македонија, Никола Димитров во денешното обраќање пред Комитетот за надворешни работи во Европскиот парламент (AFET) зборуваше за новото лице на Македонија, како држава на можности, а не на кризи.
МНР Димитров пред членовите на Комитетот даде детален осврт за текот на имплементација на клучните реформи во земјата, како и нашата посветеност на градење мостови на добрососедство, регионална и меѓународна соработка, со цел овозможување видлива и достижна европска перспектива:
„Градењето модерна европска демократија е, пред сè, во интерес на нашите граѓани, во интерес на земјите од регионот и од интерес на ЕУ. Стабилна, економски просперитетна и успешна Република Македонија подразбира стабилен и просперитетен регион."
Министерот појасни и дека сите треба да учиме лекции од минатото во поглед на статус кво-то на планот на европските интеграции. На европарламентарците им порача „Предолго време искусуваме ветер во лице, дадете ни ветер во грб, а ние ќе возвратиме со мирни води и плодна жетва“. Вратеното внимание на нашиот регион во "храмот" на европската демократија - Европскиот Парламент, МНР Димитров го поздрави како охрабрувачки сигнал. Додаде дека сега е вистинското време да се препознае моментумот и ургентноста за енергичен и позитивен ангажман кон повеќе, а не помалку ЕУ интеграција со цел да ни случат добри работи, нам, на нашиот регион и на нашата Европа.
МНР Димитров оствари серија средби со повеќе евро-пратеници и притоа побара поддршка Република Македонија конечно да направи суштински исчекор во процесот на европските интеграции во текот на 2018 година.