Денеска продолжува Собранието со работа, ВМРО-ДПМНЕ ќе присуствува само на 36 седница

Добивај вести на Viber

Денеска попладне во 14.00 часот Собранието продолжува со работа со 32 седница, а на дневен ред е и 36-та која ги опфаќа законите за економска помош за граѓаните и фирмите за време на пандемијата.

Пратеничката група на ВМРО-ДПМНЕ ќе присуствува само на 36. седница на чиј дневен ред се законите од петтиот пакет мерки, изјави синоќа координаторот на пратеничката група Никола Мицевски. На гостувањето во централниот дневник на телевизија Сител, Мицевски рече дека нема да присуствуваат на 32. седница, која е закажана пред 36. седница.

– Пратеничката група на ВМРО-ДПМНЕ ќе биде во Собранието и ќе учествува во работата на 36. седница. Доколку немаат пратеници, сите 44 пратеници на ВМРО-ДПМНЕ ќе бидат во пленарната сала. Нема да бидеме внатре на 32. седница. Работа на претседателот на Собранието е да констатира има или нема кворум за 32. седница. Доколку има кворум, работи по 32.седница и завршува со неа. Доколку нема кворум, не ја ни почнува или констатира и ја презакажува за некој нареден период, рече Мицевски.

Во четвртокот не беа изгласани овие закони со кои ќе можеше да бидат ослободени финансиските средства, пред се за компаниите, откако претседателот на СОбранието, Талат Џафери, не сакаше да прејде на 36 седница, додека пак пратеничката група ВМРО-ДПМНЕ правеше влези-излези во салата и не сакаше да прави кворум за 32 седница, знаејќи дека на тенкото владеачко мнозинство поради Ковид-19 му недостасуваат тројца пратеници.

За денеска и од опозициската коалиција Алијанса за Албанците и Алтернатива испратија сигнали дека ќе присуствуваат на седницата за да не му дадат изговор на спикерот Џафери.