ДЕНЕСКА ПОГРЕБ НА УШТЕ ШЕСТ ТИНЕЈЏЕРИ ВО БИХ: Телата на осумте млади беа пронајдени по новогодишната ноќ

Добивај вести на Viber

Уште шест од осумте тинејџери кои трагично се задушија на новогодишната ноќ, денеска ќе бидат погребани во Ракитно во БиХ. Во текот на вчерашниот ден најблиските роднини и пријатели, но и сите останати жители на Посушје се простија од двајцата млади Мирела Резо и Стјепан Јукиќ кои ги испратија до нивното вечно почивалиште.

Истрагата за големата трагедија која го трогна Балканот сè уште трае, а началникот на полицијата на кантонот Западна Херцеговина, Милан Галиќ, вели дека ќе следува и токсиколошко, како и хемиско вештачење во викендицата каде беа пронајдени телата на осумте тинејџери.

-Ќе се вештачат и уредите од куќата бидејќи причината за смртта на осумте млади лица е задушување. Тоа најверојатно се случило поради издувните гасови од агрегаторот што при истрагата го лоциравме во оставата, односно веднаш до просторијата каде се пронајдени момчињата и девојчињата. Затоа е неопходно да се направи вештачење на тој уред. Во викендицата, како што е утврдено во текот на увидот, имало и печка во која имало жар, а за да се утврди точната причина за смртта, односно да се утврди како настанало задушувањето, ќе се изврши вештачење и на оџакот, посочува во изјава за босански Аваз, Милан Галиќ.