Дали граѓаните почнаа да набавуваат дрва за огрев?

Добивај вести на Viber

Дел од граѓаните веќе почнале да набавуваат дрва за огрев за претстојната грејна сезона. Ова го потврдуваат од ЈП„Национални шуми“. Сепак како што наведуваат, во следниот период, побарувачката на дрва за огрев ќе се интензивира.

„Граѓаните веќе почнаа да склучуваат договори за набавка на огревно дрво за претстојната сезона. Иако побарувачка има во текот на целата година, генерално граѓаните со поголемата побарувачка започнуваат кон крајот на август и тоа следи во месецот септември и октомври. Најбарани се дрвните видови, даб и бука. Во просек се нарачуваат од 6 до 8 просторни метри огревно дрво“, велат од „Национални шуми“ и додаваат дека ценовникот е објавен на нивната веб страница.

Граѓаните велат дека е добро навреме да си обезбедат огревни дрва, без разлика дали на тој начин ќе заштедат или не.

„Татко ми во април или мај купува дрва. Така е поевтино, дрвата ќе отстојат и така е подобро. Во куќите се трошат повеќе дрва за разлика од становите“, вели Гордана Николовска, граѓанка.

Луѓето набавуваат дрва во согласност со своите потреби.

„Купивме 5-6 кубни метри дрва, а дали ќе биде доволно зависи каква ќе биде зимата. Мене повеќе ми се допаѓа греењето на дрва, затоа што домот е потопол. Струјата е скапа  и сега пак ќе поскапе“, рече Магдалена Трајковска, граѓанка.

Оваа пролет имавме посвежо време од вообичаено и граѓаните велат дека има температурни осцилации.

„Купивме 7 кубици дрва, а дали ќе биде доволно не се знае. Видовме оваа пролет колку долго палевме оган. Исто е, не е поевтино според мене, дали порано или подоцна ќе се набават дрваата, но да си обезбедиме навреме“, кажа Снежана Зафировска, граѓанка.

Шумарските инженери советуваат дека е најдобро граѓаните да си купат дрва во мај или јуни, за да можат тие да се исушат и да бидат спремни за есенските и зимските месеци.

Како што објави Државниот завод за статистика, во 2019 година, 49.2  отсто од домаќинствата користеле огревното дрво за загревање на домот, а потоа следи згревањето со електричната енергија со 31.3 отсто. Поради енергетската криза, лани имаше голема побарувачка за дрва за огрев. Статистички, најголем дел од домаќинставата на село користат дрва. Владата лани презема мерки со тоа што ги огранични цените на огревното дрво. 

foto freepik.com