Британската престолнина може да го има првиот градоначалник муслиман

Добивај вести на Viber

Денес лондончани избираат нов градоначалник и општински совет. Резултати се очекуваат во петокот вечерта.

Во трката за градоначалник се вклучија 25 кандидати, а засега фаворити се двајца.

Тоа се лабуристот Садик Кан и Зак Голдсмит од Конзервативната партија.

Поранешниот градоначалник на Лондон - Борис Џонсон, кој управува со градот во период од осум години, одлучи да не се кандидира повторно.

Садик Кан е син на пакистански имигранти и правник. Тој бил дел од кабинетот на поранешниот премиер Гордон Браун и е првиот муслиман кој станал дел од владата.

Зак Голдсмит е син на милијардерот Сер Џејмс Голдсмит, а десет години тој бил уредник на списанието „The Ecologist“. Тој е познат по својата активна позиција во заштита на животната средина.

Последните анкети му даваат предност на Садик Кан, кој има големи шанси да стане првиот градоначалник муслиман на британската престолнина.

Вчера британскиот премиер Дејвид Камерон ги повика од својот профил на Фејсбук лондончаните да гласаат за кандидатот на Конзервативците Зак Голдсмит, за да си обезбедат подобра и посветла иднина во следните четири години.