Официјално: Тенковите „Абрамс“ тргнати од првата борбена линија
Објавено во: Свет 06 Мај, 2024
Американските тенкови „Абрамс М1А1“ со одлука на Украина се тргнати од првата борбена линија на фронтот. Ова го потврдија двајца американски воени претставници.
Ваквата одлука следува со објаснување дека „руските беспилотни летала ја отежнале операцијата на тенковите“.
Претходно САД испрати 31 „Абрамс“ во Украина со согласност во јануари 2023 година. Еден тенк чини 10 милиони долари, а беше предвидено со нив да се предводи офанзивата. Пет од 31 тенк веќе се изгубени во руските напади.
Висок американски воен функционер, кој сакаше да остане анонимен, истакна дека ширењето на беспилотните летала на украинското бојно поле значи дека „нема отворен терен преку кој можете само да возите без страв дека ќе бидете откриени“.
Дека тенковите се поместени од линијата на фронтот потврди и потпретседателот на Здружениот Генералштаб Кристофер Грејди, но најави и дека Вашингтон ќе му помогне на Киев да подготви нова тактика.
-Кога размислувате за начинот на кој борбата еволуирала, масивниот оклоп во средина каде што се присутни беспилотни воздушни системи може да биде изложен на ризик. Ќе работиме со нашите украински партнери и другите партнери на теренот, за да им помогнеме да размислат како можат да ги користат, во таква променета средина, каде што сè е веднаш видливо, рече тој, додавајќи дека тенковите се сè уште важни.