Добивај вести на Viber
Министерството за надворешни работи денеска им препорача на македонските граѓани да се воздржат од патување во западно-африканските држави Сиера Леоне, Либерија и Гвинеја.
Препораката се упатува „поради нестабилната безбедносна состојба и зголемениот број случаи на заболени од смртоносниот вирус ебола.
Слични препораки деновиве издадоа повеќе европски земји поради стравувањето дека опасниот вирус би можел лесно да се прошири и на европскиот континент.
Стравот се зголеми откако 40-годишен заболен Американец успеал да се качи на два меѓународни лета иако имал симптоми, повраќал и имал температура. Патувал дури со 2 преполни меѓународни авиона од Либерија до Гана, а потоа и до Того. Починал кога стасал во Лагос, Нигерија. Се алармира дека сите што биле во авионите со него се во сериозна опасност бидејќи еболата е многу заразна и смртоносна во 90 насто од случаите. Пронајдени се 59 патници од кои 20 се веќе тестирани, но властите имаат проблем да ги лоцираат и другите патници кои може да се упатиле каде било во светот.
Досега починале 670 лица, а Светската здравствена организација располага со податоци за над 1200 заболени. Лекарите кои се соочуваат со епидемијата од смртоносниот вирус против кој нема лек предупредуваат на опасноста тој да излезе од контрола.