Заев се сретна со Кечијанг

Добивај вести на Viber

Македонскиот премиер Зоран Заев се сретна со кинескиот колега Ли Кечијанг и побара да продолжи економската соработка на Македонија со Народна Република Кина и работата на проекти кои ќе придонесат за инфраструктурен и економски развој на земјата.

Двајцата лидери се сретнаа на маргините на 7. Самит на шефови на влади од процесот за соработка на Народна Република Кина со земјите од Централна и Источна Европа (16+1), што вчера се одржа во Софија. На средбата присуствувале и делегации на владите на двете земји.

Шефот на македонската Влада ја нагласил значајната поддршката што кинеската влада ја дава во напорите за забрзување на изградбата на двата автопата Кичево – Охрид и Миладиновци – Штип.

Како што соопшти владината прес-служба, Заев ја потенцирал важноста на поддршката којашто во континуитет НР Кина и ја дава на Република Македонија од независноста до денес, додавајќи дека нашата земја продолжува да ја поддржува политиката на една Кина.

Македонскиот премиер на средбата информирал дека процесот за воспоставување безвизен режим меѓу двете земји е во завршна фаза и посочил дека очекува да се зголеми движењето и комуникацијата помеѓу граѓаните на двете земји, што ќе резултира со развој на туризмот, поголема културна соработка, поврзување и воспоставување  поблиски релации.