Заев наредил да се измери рејтингот на Шекеринска, Спасовски, Димитров и Пендаровски

Добивај вести на Viber

Премиерот Зоран Заев пред да замине на зимски одмор минатата недела нарачал преку внатрепартиска анкета да се измери рејтингот посебно за министрите Радмила Шекеринска, Никола Димитров и Оливер Спасовски, како и националниот координатор за НАТО, Стево Пендаровски. Како што објави „Независен“, оној што би добил најмногу гласови од анкетата помеѓу овие четворица функционери би бил кандидат номиниран од СДСМ за претседателските избори на пролет.

Повикувајќи се на внатрепартиски извори, овие четворица биле најмногу мотивирани да влезат во трката за избор за нов шеф на државата.

„Пред да замине на скијање, тој даде задача да се направи анкета и да се испита рејтингот на четворицата кандидати кои покажаа аспирации да бидат наши претседателски фаворити. Тоа се Стево Пендаровски, Оливер Спасовски, Радмила Шекеринска и Никола Димитров. Сондажите сè уште се во тек, но времето нè гази, чекаме да заврши процесот со ратификацијата на договорот за името во грчкиот парламент, па веќе идната недела би требало да знаеме со кого ќе истрчаме на изборите кон крајот на април“, вели функционер на СДСМ како извор на „Независен“.

Истиот извор вели дека агендата на СДСМ за овие избори нема да биде под влијание на ДУИ, иако од коалициониот партнер бараат консензуален кандидат.

„Како и да е, ДУИ не е таа што ќе го диктира нашиот избор“, заклучува соговорникот.