За декември ЕСМ купи струја од 20 милиони евра, околу 12 милиони дадени само за еден снабдувач
Објавено во: Економија 27 Декември, 2022
Во декември АД ЕСМ купи или договори увозна струја по вкупна сума од околу 19,6 милиони евра. ЕСМ Продажба ги објави сите договори до крајот на месецот, односно до 1 јануари 2023, иако се остава простор во последните денови од годинава да се склучи уште некој.
Од оваа сума, како што пресмета „Фактор“, најмногу пари - 11,7 милиони евра се наплатени од новоетаблираната албанска компанија ЕТМТ Енерџи. Понатаму следуваат словенечката ГЕН-И со нешто помалку од 4,5 милиони евра, Енерџи Фајненсинг Тим со 1,57 милиони, Дуферко со 1,4 милиони и Данске Комодитис со нешто повеќе од 250.000 евра.
Доколку остане вака до крај, во декември ќе има помала купопродажба на увезена струја од ноември, кога за 23 дена беа исплатени повеќе од 22 милиони евра од ЕСМ.
Во ноември започнаа набавките на ЕСМ од слободен пазар и сега за помалку од два месеци се доаѓа до сума од потрошени 44 милиони евра.
Во декември електроенергетскиот систем работеше со сите капацитети освен третиот блок на РЕК Битола каде што во наредните денови се очекува вградување на нов трансформатор кој по долго чекање пристигна од Турција. Во саботата вечерта изби пожар во РЕК Осломеј и таму не е познато колку денови ќе бидат потребни за оваа термоелектрана повторно да биде вклучена на мрежата.
Од ЕСМ нагласуваат дека зголемените набавки се резултат на тоа што од први декември на ЕСМ Продажба се приклучени и други потрошувачи по одлука од Влада, како фирми од прехранбената индустрија, училиштата и водостопанствата.
Останува во јануари да се види дали ќе се реализира одамна најавеното комплетно покривање на потребите за електрична енергија на домаќинствата и малите потрошувачи од сопствено производство, кога треба да проработи повторно Осломеј и третиот блок на РЕК Битола. До сега ЕСМ секојдневно купува електрична енергија од слободниот пазар за кои плаќа милионски суми.
Александар Кузмановски