Во Франција спречен нов терористички напад, се подготвувале напади врз воени бази
Објавено во: Свет 16 Јули, 2015
Француските безбедносни сили спречиле напади врз воени бази во земјата и уапсиле четири лица, чиј лидер е поврзан со осудените на затвор џихадисти, соопштил министерот за внатрешни работи Бернар Казнаов, цитиран од светските агенции.
Осомничените, на возраст помеѓу 16 и 23 години, биле уапсени на различни места во Франција во понеделникот. Еден од нив служел во француските поморски сили.
Четворицата планирале да дејствуваат во јануари 2016 година. Водачот на групата бил ставен под набљудување, откако неговите активности по интернет предизвикале сомневање, открил францускиот министер за внатрешни работи. Тој, на пример, изразил желба да оди во Сирија.
Нема податоци за четворицата уапсени дека се поврзани со двојната експлозијата во петрохемиската фабрика крај Марсеј во вторникот, кој бил предизвикан намерно на денот на националниот празник на Франција.
Францускиот министер за внатрешни работи истакнал дека таквите заговори се спречуваат секоја недела во земјата.
1850 граѓани или луѓе со постојано живеалиште во Франција се дел од џихадистките мрежи. Се проценува дека 500 од нив сега се во Сирија или Ирак.
Синоќа францускиот претседател Франсоа Оланд прв пат објави дека во земјата оваа недела биле спречени терористички активности.