Власта ќе наплати пенали од странска фирма за непочитување договор
Објавено во: Економија 09 Ноември, 2017
Агенцијата за странски инвестиции води постапка за наплаќање на пенали од една странска компанија лоцирана во Бунарџик, бидејќи не го испочитувала потпишаниот договор. Информацијата ја потврдуваат од Агенцијата за странски инвестиции, но не откриваат за која фирма се работи.
„Констатирана е повреда на договорна обврска во делот на обврската за одржување на просечен годишен минимум на работни позиции за две календарски години и за истото е иницирана постапка за активирање на договорни пенали која е во тек, велат од Агенцијата за странски инвестиции, за Фактор.
Претходно пак, со истата компанија се водел и судски спор, бидејќи не го испочитувала договорот во делот на бројот на вработувања што требало да ги реализира. Поради тоа и биле наплатени пенали.
„Заклучно со 1 ноември 2017 година само во еден случај е констатирана повреда на договорни одредби од страна на корисник на ТИРЗ„Скопје 1” за што беше покрената судска постапка за активирање на договорни пенали поради неисполнување на преземена договорна обврска по основ на креирање определен број на работни позиции, постапка која е правосилно завршена и наплатени се договорни пенали во корист на буџетот на Република Македонија, велат за Фактор од Агенцијата за странски инвестиции.
Од Агенцијата велат дека редовниот мониторинг за исполнување на обврските што ги имаат странските компании продолжуваат а за секое отстапување ќе бидат превземени соодветни мерки.
Договорите со странските инвеститори претходната гарнитурта ги држеше во тајност – но со доаѓањето на новата влада, тие се декласифицирани а владата најави дека ќе бидат и обелоденети.