Власта ќе извлече 20 тони злато од земја погодена од криза
Објавено во: Економија 30 Јануари, 2019
Постојат сомнежи дека власта во Венецуела ќе извлече големи количини злато од земјата.
Aвион на руска авиокомпанија слетал вчера во венецуелскиот главен град, Каракас со цел да изнесе 20 тони злато од резервите на венецуелската Централна банка. Ова го објави на Твитер пратеникот во Националното собрание на Венецуела, Хосе Гера.
Авионот полетал без патници и истиот ден слетал на меѓународниот аеродром во Каракас.
Гера не изнесе докази за тоа, но, како што објави агенцијата „Блумберг“, тој во минатото бил економист во Централната банка и одржува контакти со своите поранешни колеги.
Друг извор за „Блумберг“ потврдил дека банката планирала да изнесе 20 тони злато во вредност од 840 милиони долари, или скоро една петтина од златните резерви на Венецуела.
Официјални лица од „Нордвинд“, Министерството за финансии на Венецуела, како и Дмитриј Песков, портпаролот на рускиот претседател Владимир Путин, досега не дале коментари за обидот да се изнесе злато од земјата.
Лидерот на опозицијата во земјата, Хуан Гуаидо минатата недела се самопрогласи за привремен претседател на Венецуела, и го повика актуелниот претседател Николас Мадуро да распише претседателски избори.
САД одлучија да му дозволат на Гуаидо контрола врз капиталот и сметките на Венецуела во американските банки. Мадуро има поддршка од Русија и Кина.