Добивај вести на Viber
Туризмот во Македонија не е во криза, туку бележи позитивни трендови, уверуваат вицепремиерот за економски прашања Владимир Пешевски и министерот за економија Беким Незири. Според податоците кои се разгледувале на денешната владина седница, во 2013 година бројот на туристи во Македонија за првпат достигнал 700.000, што е речиси двојно зголемување во однос на 2006 година.
„Како што напоменав трендовите се позитивни и оваа година односно бројот на туристи во периодот јануари-мај во однос на истиот период минатата година е зголемен за 6,7% и тоа кај домашните туристи за 9,9% и кај странските туристи за 4,8%“, вели Пешевски.
Според него, причината за ова лежи во владините мерки - субвенционирањето на странскиот организиран туристички промет и субвенционирањето на авио летовите на ниско буџетните компании, со кое се реши проблемот со директните конекции со поголемите градови во Европа и светот. Оваа година листата на дестинации е дополнета со нови тур-оператори и со нови дестинации, за што се обезбедени субвенции во висина од 155 милиони денари
Покрај постоечките 8 авионски линии кон Малме, Дортмунд, Минхен, Базел, Лондон,Ајндховен и Милано, Столкхом и Гетеборг се воведуваат и нови три и тоа за Париз, Франкфурт и Брисел. Субвенционираните туристички тури се прошируваат со Кина и Индија од годинава, како и со САД, Британија, Казахстан, Катар, Азербејџан и Германија од 2015 година.
Позитивните трендови вио туризмот предизвикуваат и зголемување на бројот на вработени во овој сектор, вели министерот за економија.
„Лани во Македонија биле вработени 8.500 лица во туризмот што претставува 1,2 % од вкупниот број на вработени во земјава. Според проценките на Светскиот совет за патување и туризам годинава бројот на вработени во овој значаен сектор ќе достигне 10.000 и тоа ќе претставува зголемување на учеството на БДП за 1,9%“, појасни Незири.
Во Македонија се вработени уште 31.000 лица во областите кои се поврзани со туризмот.