Велика Британија со идеја за воведување данок на деменција
Објавено во: Свет 25 Февруари, 2018
Во Велика Британија се разгледува можноста за воведување на данок на деменција. Оваа мерка би била за лицата кои имаат над 40 години со што би се обезбедиле средства за финансирање на растечкиот број на луѓе за кои се верува дека ќе живеат до сто години.
Ова е предлог на поранешниот заменик премиер Демијан Грин, кој рече дека новата мерка под наслов „Данок на деменција 2“ е единствен начин да се осигура потребната секојдневна нега на старите лица која им е потребна за да можат достоинствено да живеат и да умрат.
Според него, предлогот на премиерката Тереза Меј постарата популација да се одрече од дел од вредноста на својот имот за да ги плати трошоците за лечење и старски дом, е производ на нејзиниот неуспех да добие мнозинство во долниот дом, пишува Daily mail.
„Сѐ повеќе луѓе ќе живеат до 100 години. Државата за тоа мора да се подготви. Можно е да се воведе задолжителен данок од два отсто за лицата постари од 40 години за да се загарантира социјална грижа и внимание“, вели Грин.
Според неговите процени, ако лицето годишно заработува 27.000 фунти данокот би изнесувал 364 фунти годишно.