Усвоен мини-ребалансот на буџетот

Добивај вести на Viber

На синоќешната седница на Владата е усвоен  ребалансот на Буџетот и истиот е доставен до Собранието на Република Македонија. Според министерот Ставревски станува збор за мини-ребаланс кој изнесува околу 2 отсто од вкупните приходи и расходи.

 - Причината е да се усогласи динамиката на расходи која е подобра од предвидувањата посебно во делот на инфраструктурата со динамиката на приходната страна. Со ребалансот обезбедивме дополнителни средства за реализација на одредени инфраструктурни проекти, вели Ставрески.

Тој посочи дека за разлика од некои земји, од Србија и Португалија кои ја намалија платата за 10 проценти, во Македонија не само што ќе нема намалување на платите и пензиите, туку напротив октомвриската плата на јавната администрација ќе и биде зголемена за 5 проценти како што беше најавено, а по Нова година ќе следи и зголемување на пензиите.

Буџетскиот дефицит со ребалансот ќе оствари благо зголемување од 3,5 на 3,9 отсто од БДП.

- Тој простор ќе го искористиме за дополнителни средства од милијарда и 43 милиони денари за поинтензивна градба на Коридорот 10. Таму градбата оди добро и сакаме годинава да се дозавршат работите побрзо, затоа обезбедуваме дополнителни средства, изјави Ставрески дополнувајќи дека ќе има и дополнителни средства во делот на социјалните примања.

Кратењата се рамномерни во делот на стоки и услуги на трансфери и на капитални расходи, при што рамномерен е износот на намалување на сите позиции и кај сите буџетски институции.

-Со овој мини ребаланс ќе успееме да останеме во зоната на фискална стабилност и да обезбедиме непречено реализирање на сите проекти на Владата на РМ. Со тоа ќе обезбедиме долгорочна макроекономска стабилност и реализација на поголем екононски раст кој годинава очекуваме да биде над 3,5 отсто - вели министерот Ставрески.