Добивај вести на Viber
Шеесет и двегодишниот жител на Тетово, Cабедин Јашари, утринава, додека полнел вода од градскиот водовод, во неа нашол паразит “коњско влакно“.
Јашари, оваа вода, од пред извесно време, ја користи само за миење и перење, а за пиење купува зашто, вели, за неполн месец, во неа четири пати пронашол паразити.
- Кога има вода, децата постојано доаѓаат и пијат од чешма, така што може да им се случи нешто. Еднаш, кога жените ги миеја чиниите, исто така излезе ваков црв, но го фатив и го фрлив - изјави Јашари.
Претставници од Јавното комунално претпријатие го посетија домот на Јашари, но не сакаа да дадат изјава за тоа како паразитот се нашол во водата.
Според информациите од тетовскиот Центар за јавно здравје, „коњското влакно“ е паразит што се наоѓа во води кои не се хлорираат и обично онаму каде што има комарци и други инсекти. Не предизвикува болест кај луѓето, но не смее да го има во водата за пиење.
Оттаму посочуваат дека водата во градскиот водовод во Тетово редовно се хлорира и контролира.