13 Август, 2020
0.0601

Тасевска, Ацевски или некој трет - партиите го договориле ревизорот, денеска на комисија

Објавено во: Македонија 06 Декември, 2019

По две години без директор и по многу неуспешни обиди коалиционите партнери да „пресечат“, клучната институција што контролира како се трошат државните пари, Државниот завод за ревизија, денеска по се изгледа конечно ќе добие човек што ќе застане на нејзиното кормило. 

Претседателот на собраниската Комисија за прашања на изборите и именувањата, Илија Димовски, за денеска закажа продолженија на три седници, а на едната од нив повторно е изборот на главен ревизор.

Извори од владејачкото мнозинство велат дека името на личноста што ќе седне на главното ревизорско столче е договорено, па според нивните очекувања, за него денеска ќе се обезбеди мнозинство од седум пратеници, колку што е потребно за предлогот да помине на комисијата, а потоа да оди на гласање и на пленарна седница на Собранието.

И самите народни избраници се свесни дека најавените вонредни парламентарни избори не смеат да поминат без главен државен ревизор, и затоа неговиот избор се смета и за повеќе од ургентен.

„Нашите очекувања се дека ќе се избере ревизор. Би било многу лошо ако седницата се отвори, и ако потоа се затвори. Тоа би значело дека се затвора и конкурсот, па кандидатите што се пријавени веќе нема да можат да бидат во игра. Но, воопшто не очекуваме тоа да се случи, туку дека на седницата ќе се избере кандидат кој ќе добие поддршка од седум пратеници“, велат за Фактор дел од народните избраници.

Според нив, новиот контролор на трошачите на народни пари треба да се гледа во еден од преостанатите 10 кандидати, од првично пријавените дванаесетмина, откако двајца пријавени практично „настрадаа“ во бесконечните партиски игри. Всушност, несогласувањето меѓу коалициските партнери, СДСМ и ДУИ, беше причина на последната седница на комисијата ниту еден од двајцата кандидати да не го добие потребното мнозинство гласови. Тоа, пак, значи дека тие повеќе не можат да бидат избрани, и за нив практично трката за главен државен ревизор е завршена. 

А што се случуваше на последната седница? Пратеникот Мухамед Зеќири од СДСМ го предложи Адем Цури за државен ревизор, но за него гласаа шест пратеници, што не е доволно за избор. А притоа, петмина од нив беа пратениците на СДСМ, како и пратеникот Фадиљ Зенделли од БЕСА, но за Цури не гласаа пратениците од ДУИ, и неговиот избор не беше возможен. Додека, пак, предлог на пратеникот Ејуп Алими од ДУИ беше Насер Адеми, кој до скоро беше на позицијата заменик државен ревизор. Но, и за него не се обезбеди потребен број гласови. Седницата беше прекината, а овие двајца кандидати практично веќе отпаѓаат и нема можност да бидат избрани.

Некои сознанија говорат дека, барем според досегашните партиски разговори, двајца од преостанатите кандидати имале најголеми шанси. Едно од имињата што се споменуваше е Тања Тасевска, која долги години е во ДЗР и практично се смета како еден од основачите на таа институција. Второто име што беше во игра е Максим Ацевски, исто така човек од внатре од ДЗР. Двајцата важат за професионалци, но и за нив имало партиски несогласувања. Затоа сега до седницата веројатно ќе биде неизвесно дали на местото ќе седне Тасевска, Ацевски или можеби некој трет кандидат. 

Ревизорските извештаи се меѓу клучните од кои Обвинителството и другите органи на прогонот треба да црпат информации за незаконско работење, па затоа ДЗР се смета како една од најбитните институции што треба да ги лови обидите за проневери на буџетските средства. 

А експертите од поодамна предупредуваат дека не смее да се дозволи изборите да поминат без прв човек на ДЗР, бидејќи во спротивно партиите би биле комотни во трошењето на парите, но и во прибирањето на донациите. Проблемот е дотолку поголем што тие од пред година и половина добиваат многу повеќе буџетски средства за нивно финансирање, откако „братски“ го сменија Законот за финансирање на политичките партии. Со тоа, наместо 1,8 милион евра како досега, од буџетот партиите сега добиваат 4,5 милиони евра на годишно ниво, или 0,15 проценти од вкупните приходи во државната каса.

Неодамна и самите вработени во ДЗР, заеднички излегоа на прес конференција, за да апелираат до политичарите итно да најдат решение. Бидејќи без прв човек, како што тврдат, инстититуцијата е целосно блокирана. Дури 43 ревизорски извештаи не може да бидат комплетно завршени, без потпис од главниот ревизор. 

Нина Нинеска-Фиданоска

Можеби ќе ве интересира

Талат Џафери свика седница за избор на претседател на Собранието

Талат Џафери свика седница за избор на претседател на Собранието

ФАКТОР НА ДЕНОТ: Пендаровски утре ќе му го даде мандатот на Заев, а Еуростандард банка ќе оди во стечај

ФАКТОР НА ДЕНОТ: Пендаровски утре ќе му го даде мандатот на Заев, а Еуростандард банка ќе оди во стечај

Женско тело е извадено од водите на реката Пчиња

Женско тело е извадено од водите на реката Пчиња

Кривични за скопјани кои славеле во време на пандемија

Кривични за скопјани кои славеле во време на пандемија

Кои градови се со најмалку активни случаи?

Кои градови се со најмалку активни случаи?

Кои скопски општини имаат повеќе од 100 заразени со Ковид -19?

Кои скопски општини имаат повеќе од 100 заразени со Ковид -19?

ССНМ: Државните институции да обезбедат безбедни услови за новинарите и медиумските работници

ССНМ: Државните институции да обезбедат безбедни услови за новинарите и медиумските работници

Филипче: Комисијата за заразни болести смета дека е огромен ризик aко училиштата целосно се отворат

Филипче: Комисијата за заразни болести смета дека е огромен ризик aко училиштата целосно се отворат

ПОВЕЌЕ ОЗДРАВЕНИ ОД ЗАБОЛЕНИ - 139 нови случаи, охриѓанец ја изгуби битката со короната

ПОВЕЌЕ ОЗДРАВЕНИ ОД ЗАБОЛЕНИ - 139 нови случаи, охриѓанец ја изгуби битката со короната