Талат Џафери контра Зоран Заев: Од каде да ги најдам тие 15 дена!
Објавено во: Македонија 05 Февруари, 2020
Претседателот на Собранието, Талат Џафери, вели дека не е можно да се обезбедат дополнителни 15 дена пред распуштањето на законодавниот дом и истовремено да не се промени датумот за предвремените праламентарни избори како што најави претседателот на СДСМ, Зоран Заев.
Според спикерот, не е можно да се остави простор за носење закони, наместо до 60, до 45 дена пред распуштањето на Собранието како што посакува лидерот на владеачката партија. Заев ова го побара за да има време да се изгласаат реформските закони, меѓу кои и тој за Јавно обвинителство, или во спротивно, како што и порача на опозицијата - нема да има избори на 12 април.
„Лидерите на парламентарните партии заедно се договорија да се одржат избори на 12-ти април, и тогаш знаеја кои закони се битни за донесување пред да се распушти парламентот. Сега во последен миг се пласираат идеи кои се косат со законските рокови за изборните дејства. Уставот е јасен: избори за пратеници во Собранието се одржуваат во последните 90 дена од мандатот на стариот пратенички состав или во рок од 60 дена од денот на распуштањето на Собранието. Институциите треба да работат според закон, а не според желби. И јас сум член на партија, и на партијата ѝ кажувам какви се роковите. Не е дека сакам да опонирам, туку мора да ги почитувам нормите", вели Џафери за Дојче Веле.
Тој како аргумент ги додава врзаните рокови за работа кои ги имаат другите институции поврзани со спорведувањето на изборниот процес.
„Може ли да има независни листи, кои имаат временски рок за собирање потписи? Може. Како ќе им го скратите тој рок? Тука се и законски определените рокови за жалбени постапки до ДИК, до Управниот и до Вишиот управен суд. Можете ли ним да им речете дека денеска мора да донесат одлука? Не. Има роковник, кој точно ги овозможува сите непоходни дејства. И оној рок од 51 ден кој го спомнувам како минимален за реализирање на изборните дејства, е речиси на граница на ризик ‘до минута'. Што ако падне елeктронскиот систем на ДИК? Не ќе може да ги прими листите“, останува на својот став Џафери.