СЗО: 56 милиони долари се потребни за справување со вирусот зика
Објавено во: Свет 17 Февруари, 2016
За да се спречи ширењето на вирусот зика, потребни се 56 милиони долари. Ова се наведува во акциониот план за борба против вирусот, објавен на официјалниот сајт на Светската здравствена организација (СЗО).
Стратегијата е насочена кон мобилизирање и координирање на партнери и експерти, како и изнаоѓање на средства за следење на вирусот, посочуваат од СЗО.
Средства се потребни и за подобрување на контролата на ширењето на вирусот, заштитни мерки, студии за развој на вакцини, методи за дијагностицирање и лекување.
Генерално за спроведување на планот ќе бидат потребни 56 милиони долари. Од оваа сума 25 милиони ќе бидат искористени за финансирање на работата на организацијата и нејзините регионални ограноци, а 31 милиони ќе одат за клучните партнери на СЗО, кои ќе водат борба против вирусот.
За првпат зика вирусот е откриен во 1947 година во Уганда и до неодамна се сметаше за безопасен за луѓето. Тој предизвикува висока температура, конјунктивитис, главоболка и болки во мускулите и зглобовите, гадење и повраќање. Вакцина против вирусот не постои.
На крајот на ноември 2015 година, Министерството за здравство на Бразил предупреди дека вирусот влијае на бремените жени и предизвикува малформации кај бебињата кои се раѓаат со значително намален череп.