Станицата во Будимпешта останува центар на тензиите со бегалците

Добивај вести на Viber

Централната железничка станица во Будимпешта продолжува да е затворена за мигрантите, пренесуваат светските агенции. Илјадници луѓе остануваат надвор од зградата на станицата и унгарските власти се придржуваат до правилата на ЕУ и не им дозволуваат да ја напуштат земјата во насока на Германија или друга западноевропска држава.

Околу 3.000 мигранти се пред станицата „келеш“ во Будимпешта. Многумина од нив ја минале ноќта легнати пред главниот влез на зградата, чувани од полицијата. Граѓански патроли и помагаат на полицајците за одржување на редот меѓу мигрантите. Волонтерски групи обезбедуваат храна, облека и медицинска помош.

Стотина мигранти протестираа рано утринава пред станицата, пренесе „Франс прес“. „Ќе останеме тука додека не успееме да се качиме на возот за Германија. Ќе продолжиме да протестираме секој ден, си ги сакаме правата“, изјавил Сириецот Мохамад, еден од демонстрантите, кои се на број помеѓу 100 и 150 луѓе.

Околу 600 лица, вклучувајќи и жени и деца, главно од Сирија, Ирак или Авганистан, се собрале пред станица „келеш“, седнати на земјата. А околу 1.200 други се внатре, во транзитната зона, пренесува „Франс прес“.

Вчера властите ги натераа бегалците да ја напуштат станицата, откако околу 500 мигранти се обидоа да се качат на последниот воз за Виена во хаосот. Станицата продолжила со работа, но пристапот на мигрантите беше забранет, без да се прецизира до кога ќе е во сила оваа мерка. Ова доведе до спонтан протест на околу 200 луѓе пред станицата, кои извикуваа „Германија Германија“ и „Сакаме да заминеме“ и ги покажуваа своите деца, кренати во раце.

На друга станица во предградието на Будимпешта стотина мигранти пристигнале од центарот за регистрација на границата со Србија, седнале на платформата и одбивале да се качат на возот, кој требаше да ги однесе во центарот за бегалци во Дебрецен. Според полицијата групата побарала дозвола да замине за Германија.

Во август Унгарија прими 50 000 мигранти. Владата на премиерот Виктор Орбан, кој изгради 175-километарска ограда од бодликава жица на границата со Србија, изјавил дека ги применува правилата на ЕУ, со што не им овозможува на мигрантите без виза да заминат. Оградата сепак не го запира протокот на мигрантите од Грција во Западен Балкан. Унгарските власти соопштија дека вчера 2284 лица ја преминале границата. Меѓу нив имало и 353 деца.

„Ако Европа ни овозможува да влеземе, зошто не ни даваат визи? Зошто треба да го правиме тоа нелегално патување?“, Прашува Билал, Сириец од опустошениот град Алепо. „Стравуваме дека работите ќе се променат и еден ден дури Германија ќе ги затвори своите граници, кога ќе и омрзне од бегалци, па затоа треба да патуваме што е  можно побрзо“, додал тој.