Сириската опозиција ќе учествува на преговорите во Женева

Добивај вести на Viber

Сириската опозиција се согласи да учествува во мировните преговори под покровителство на ОН, закажани за оваа недела.

Ова го изјави за АФП претставник на Врховниот комитет за преговори, во кој се собрани некои од главните политички и вооружени групи, против владеењето  на претседателот Башар Асад.

„По консултации Врховниот комитет за преговори се согласи да присуствува во Женева. Делегацијата ќе пристигне во петок“, изјави портпаролот на комитетот Ријад Насан Агха.

Продолжението на преговорите во Женева, организирани од претставникот на ОН во Сирија Стефан Де Мистура, беше предвидено од самиот него за 9 март.

Претходно оваа година преговорите во кои сириската власт и бунтовниците требаше да постигнат траен мир и почеток на политичката транзиција во блискоисточната земја, беа привремено прекинати.

Условот за продолжувањето беше постигнување на прекин на огнот меѓу двете земји, ослободување на затвореници и обезбедување на пристап на хуманитарна помош до окупирани населби.

На крајот на минатата недела шефот на Врховниот комитет Ријад Хиджаб изјави дека опозицијата се уште не донела категорично решение за учеството на понатамошни мировни преговори, бидејќи владините сили кои ги поддржува руска борбена авијација нападнале бунтовнички позиции по 27 февруари.

Хиджаб сепак беше на мислење дека сеопфатна проценка на ситуацијата претстои. Таква очигледно веќе е направена и опозицијата ќе биде претставена во Женева.