Шулц: Ниту ЕУ ниту САД се подготвени за претседател како Трамп
Објавено во: Свет 12 Март, 2016
Ниту Европската унија, ниту САД се подготвени за влез на милијардерот Доналд Трамп во Белата куќа, изјави претседателот на Европскиот парламент Мартин Шулц за време на интервјуто за францускиот телевизиски канал „I-Tele“.
„Европа и САД не се подготвени за претседател, кој според мое мислење, нема никакво меѓународно искуство“, коментира Шулц, цитиран од белгиското издание „La Libre“.
За него Трамп е од луѓето кои секогаш критикуваат, но никогаш не нудат конкретни решенија и направи паралела на неговата популарност со подемот на „дивиот популизам“ во ЕУ.
Шулц предупреди дека одлуките на Доналд Трамп како претседател можат да бидат многу опасни. „Претпочитам друг кандидат“, рече уште тој во коментар на претседателската трка во САД и без посебно изненадување за набљудувачите ја изрази својата поддршка за Хилари Клинтон.
Во моментов во САД течат првичните избори, на кои главните партии мора да го дефинираат својот кандидат за претседател на земјата. Очекувањата се Републиканците да ја објават својата номинација во крајот на јули. Другите кандидати на партијата се сенаторот од Флорида Марко Рубио, сенаторот на Тексас Тед Круз и гувернерот на Охајо Џон Кеисик.
Водечки кандидат во оваа фаза во првичните избори за демократите е поранешната прва дама Хилари Клинтон. Нејзиниот кандидат во редовите на партијата е сенаторот од Вермонт Берни Сандерс.
Клинтон изгуби едни внатрепартиски избори - таа беше противник на Барак Обама, кога тој се бореше за својот прв мандат во Белата куќа во 2008 година. По изборот Обама ја назначи за државен секретар на САД.
Изборите за претседател во САД се закажани за 8 ноември 2016 година.