СЕПАК, МАЛКУ СЕ ПОДИСПЛАШИЈА ОД КОРОНА - вчера бројот на патници во автобусите помал за пет и пол илјади

Добивај вести на Viber

Ако во средата немаше речиси никакво намалување на бројот на патници што се возат во автобусите на јавниот градски превоз, веќе вчера е забележано извесно намалување.

Така барем покажуваат податоците на Јавното сообраќајно претпријатие.

Односно, ако во средата оваа недела во однос на средата минатата недела бројот на патници бил намален само за околу 1.000, веќе вчера, во однос на четвртокот минатата недела, бројот на патници бил намален за над пет и пол илјади патници. 

Односно, за околу 5.000 е намален бројот на валидации, што значи дека толку луѓе помалку ги отчукале своите картици во автобусите на ЈСП.

Или, како што соопштија од компанијата, на 27 февруари, односно вчера, имало 184.111, што е за 5.525 валидации колку што биле остварени на 20 февруари, односно во четвртокот минатата недела. 

Од ЈСП сметаат дека од овие податоци сепак не би требало да се извлекуваат избрзани заклучоци.

А како што Фактор вчера пишуваше, завчера граѓаните, па дури и пензионерите кои се сметаат за најризична група, не беа многу исплашени од коронавирусот, дури и откако беше потврден првиот случај на овој вирис во земјава. 

ЈСП, пак, вчера стартуваше со вонредната дезинфекција на автобусите.

Секој автобус по завршување на смената и утврдената рута, ќе биде дезинфициран со соодветно средство на база на алкохол и Дезинтал 10 отсто, односно со распрскување ќе се третира внатрешноста на автобусот, а рачно ќе се дезинфицираат и одделни делови од возилото како ракодржачи и слично.

ЈСП Скопје одлучи да почне да ја спроведува дополнителната (вонредна) дезинфекција како мерка за заштита од корона вирусот со оглед на тоа дека јавниот превоз во Скопје секојдневно во просек го користат 115.000-130.000 граѓани, а стотици граѓани ја посетуваат и ја користат Жичарницата. 

Дополнителната (вонредна) дезинфекција ќе се врши секојдневно, се до добиените нови препораки од надлежните институции кои ја следат состојбата со корона вирусот.

Инаку, внатрешна дезинфекција на автобусите се врши секојдневно преку т.н. редовна дневна нега (чистење, миење) на возилата. Притоа, возилата се третираат со соодветни еколошки средства кои имаат дезинфекционо својство. Секое возило, пред да се пушти во сообраќај, е подложно на дневна нега.