Се заоструваат процедурите за тендерите во здравството

Добивај вести на Viber

Со цел да се подобри продуктивноста во здравството и транспарентност во трошењето на парите, се забранува групирање на повеќе артикли во еден лот при јавните набавки во овој сектор, а за секој артикал од тендерот за набавка ќе мора да биде објавен посебен лот. Ваквите измени ги соопшти министерот за здравство Никола Тодоров, како нова мерка со која ќе се постигне поголема конкуренцијата и ќе се намалат цените на артиклите. „Со оваа мерка овозможуваме сериозно зголемување на конкуренцијата што би требало да доведе до намалување на цената на артиклите кои се набавуваат и овозможување што е можно поголем број компании да се вклучат во процесот на набавки во ЈЗУ. Конкуренцијата е здрава работа и очекуваме како резултат на конкуренцијата да платиме пониска цена за истите производи или да добиеме производи со повисок квалитет за иста или пониска цена“, појасни Тодоров. Според Тодоров, оваа мерка ќе се применува само за нови јавни набавки, додека тековните тендери кои се веќе потпишани ќе се реализираат онака како што се потпишани. Притоа, вели министерот, новата мерка им забранува на установите да набават артикли спротивно на овој принцип,  а  практиката за групирање на сродните артикли во еден лот, иако не е спротивна на законот, ќе мора да се напушти. „Исто така се забранува да се преземат артикли од друг оператор, како Заеднички служби или централна набавка на повеќе установи или дури и Министерството за здравство да набавува централно, доколку не се набавени според овој принцип. Еден артикл - еден лот“, изјави Тодоров. Покрај овој, се работи и на нов проект во здравството поточно за електронски систем за мониторинг при набавките во јавното здравство. Досега, додаде, во овој систем внесени се 158.590 различни артикли, вклучувајќи ги тука и лековите кои што претходно се веќе внесени во системот „Мој термин“.