Се одложуваат пораките за договор меѓу Иран и „шесторката“
Објавено во: Свет 13 Јули, 2015
Порака за успешното завршување на преговорите во Виена меѓу шесте светски сили и Иран нема да има ни денес, иако се изрази оптимизам од многу учесници, пренесоа агенциите од австриската престолнина.
Ова беше јасно од изјавата на иранскиот министер за надворешни работи Мохамад Џавад Зариф, кој вечерва се појави на балконот на хотелот „Кобург“, каде продолжуваат консултациите за преостанатите, како што се тврди, технички прашања.
Новинарите извикаа кон министерот и го прашаа дали ќе има договор денес, а тој по карактеристичен начин кимна нагоре, што во иранската култура значи „не“. Иранските медиуми уникатно го толкуваат ова како порака дека договор вечерва нема да има.
Зариф изјавил дека постигнувањето на договор ќе биде профитабилен потег за сите учесници во преговарачкиот процес и ќе биде триумф на дипломатијата. Според него денешната ситуација на преговорите за нуклеарната програма на Техеран „е крајно едноставна и јасна“.