САД и Русија се земјите со најмногу хемиско оружје во светот

Добивај вести на Viber

САД и Русија постигнаа договор околу меѓународниот надзор врз хемиското оружје на сирискиот режим, но од друга страна токму тие се двете земји кои поседуваат најмногу хемиско оружје во светот, јавува Анадолија.

САД поседува околу три илјади тони хемиско оружје, кое нема да биде уништено пред 2023 година, а Русија поседува 20 илјади тони хемиско оружје кое, според процените, би требало да биде уништено до 2015 година.

Според податоците на Здружението за надзор на оружје во Вашингтон, САД од 1918 година почнале да произведуваат различни видови хемиско оружје. Оваа земја се до 1975 година не беше потписник на Женевската конвенција од 1925 година за забрана на хемиското оружје, а во 80-тите години од минатиот век беше соопштено дека ќе ги уништи залихите хемиско оружје.

Според последните податоци, САД имаат  тројно повеќе хемиско оружје од сирискиот режим, пренесува Анадолија.

Исто така, Русија поседува најмногу залихи хемиско оружје во светот, иако руските власти предходно изјавуваа дека до 1997 година ќе го уништат хемиското оружје кое го поседуваат.

Инаку хемиското оружје се супстанци кои поради патофизиолошкиот механизам на дејствување, во воена смисла е наменето да убие, сериозно повреди или онеспособи луѓе. Тоа вклучува боеви отрови, материи од чад и запалливи средства, а се испорачува од цистерни, мини, бомби, ракети и на многу други начини.