Добивај вести на Viber
Намалување на буџетот за федералната програма на маркички за храна на сиромашните граѓани изгласа вчера Конгресот на САД. Cо ова, земјата ќе заштеди 39 милијарди долари.
Со тоа, на сите лица меѓу 18 и 50 години, освен малолетните деца, кои до сега примаа помош, маркичката ќе им се намали или укине. Тие, во иднина ќе имаат право само три месеци да добиваат маркички за храна ако не најдат работа со барем половина работно време или не учествуваат во разни тренинг-програми за вработување.
Вкупно 3,8 милиони луѓе ќе го изгубат правото на маркички за храна, додека за 850 илјади домаќинства таа помош ќе биде намалена на 90 долари месечно.
Законот предвидува и тестирање за дрога на сите корисници на маркичките за храна, како и укинување на бенефициите за оние лица кои добиваат некоја награда на лото.
Според последните податоци, близу 48 милиони Американци, или секој седми жител на САД, добива маркичка за храна. Од тој број 85 отсто се деца, стари лица или лица со хендикеп.
Маркичката за храна претставува најголема програма во САД за борба против гладта, а бројот на луѓе кои ја користат е дуплиран во последните девет години, додека трошоците пораснале трипати.
Оваа програма предвидува помош од 1,47 долари по оброк, или во просек околу 134 долари месечно по корисник.