РКЕ: Не постои регулирана цена на гас, производителот ја добива на тендер

Добивај вести на Viber

По објавата на информации дека Регулаторната комисија за енергетика со промената на правилникот за признавање на цената на гасот на регулираниот производител на топлинска енергија добивме и одговори на конкретните прашања зошто оваа постапка е преземена. Според анализа на експерти и истражувања дојдовме до информации дека со измените на правилата на игра, БЕГ набавил гас на тендер по цена што е за 9 отсто повисока од цената по која гасот го набавила „Скопје Север“.

До РКЕ ги испративме следниве прашања:

- Образложете од кои причини РКЕ одлучи да го измени Правилникот за цени на топлинска енергија и системски услуги (од 10 јуни 2016 година) кога го замени правилото да признава цена за набавка на гас која е помала или еднаква на најниската месечна увозна цена на слободен пазар и одлучи да признава цена на природен гас постигната на тендер што е должен да го спроведе регулираниот производител и просечната продажна месечна цена на природен гас на трговци со природен гас и слободниот пазар?

- Дали знаете дека потрошувачите на БЕГ ќе платат или плаќаат 1,44 милиони евра повеќе затоа што БЕГ доби за 9,1 отсто повисока цена на тендер за набавка на природен гас од „Скопје Север“ кој при тоа набавил 40 пати помало количество на природен гас?

- Дали РКЕ ќе размисли да го промени ова правило и да го врати старото правило за признавање на најниска месечна цена откако се случи БЕГ Производство на тендер да добие цена 9,1 отсто повисока од цената што ја доби „Скопје Север“ за набавка на 40 пати помало количество природен гас?

Започнувајќи од 1 јануари 2015 година пазарот на природен гас е целосно либерализиран согласно насоките од ЕУ директивите, и цената на природниот гас се формира слободно на пазарот по договорни услови помеѓу трговците/снабдувачите и потрошувачите. Регулаторната комисија за енергетика единствено ги регулира мрежарините, односно тарифата за пренос на природен гас и тарифата за дистрибуција на природен гас.

Во вакви услови кога веќе не постои регулирана цена на природен гас, се наметна потребата од измена на Правилникот за цени на топлинска енергија и системски услуги („Службен весник на Република Македонија“ бр.28/13, 32/15, 126/15, 112-16), бидејќи до 1 јануари 2015 година во Правилникот беше пропишано дека цената на природниот гас се одобрува согласно регулираната цена дефинирана од Регулаторната комисија за енергетика.

Во услови на слободен пазар набавките се одвиваат преку тендерска постапка која што регулираниот производител ја спроведува во согласност со Законот за јавни набавки. РКЕ нема законска основа да дефинира по која цена ќе се извршат набавките. Со претходно дефинираниот услов за признавање на цена на природен гас која е помала или еднаква на најниската месечна увозна цена на слободен пазар, тендерските постапки беа неуспешни и немаше пријавено ниту еден трговец ниту од домашниот пазар ниту пак од странски добавувачи, со што се доведува во прашање сигурноста во снабдувањето со топлинска енергија. Поради ова се пристапи кон измени на ова правило и се дефинира услов во кој што во предвид ќе се имаат цените од тендерската постапка и просечната продажна цена на слободниот пазар на трговците на природен гас.

Во однос на наводите дека регулираниот производител Производство на топлина Балкан Енерџи ДООЕЛ Скопје остварил повисоки цени за природен гас за 9,1 проценти од Скопје Север, истите се неточни и во прилог ви доставуваме споредбена анализа на остварените цени на двата производители за изминатата грејна сезона, откако е извршена измената на Правилникот. Наведените цени се реализирани на слободниот пазар по комерцијални услови.