Поранешните функционери во општина Центар потрошиле 9.000 евра за кафиња и пијалоци
Објавено во: Мои пари 31 Август, 2013
Портпаролот на СДСМ, Петре Шилегов денеска изјави дека поранешните функционери во општина Центар, сеуммина од нив, за 9 месеци за кафиња и пијалаци потрошиле 9.000 евра, или по 2.000 денари дневно.
Според него, ова произлегува од ревизорскиот извештај за незаконски потрошените преку 58 милиони евра на општина Центар во реализација на проектот „Скопје 2014“.
„Само со губењето на власта во општина Центар се открија многубројни ставки за фантастично неодговорни трошења на народните пари. Токму затоа во изминатиов период ВМРО – ДПМНЕ се обидува во јавноста да наметне теми за дискусија кои се паушални и непродуктивни, вклучително и тоа што е, а што не е тоалет хартија, а се со цел да се одвлече вниманието на јавноста од ваквото трошење и од суровата реалност во Република Македонија“. рече Шилегов.
Следниот чекор кој ние и граѓаните го очекуваме од ВМРО – ДПМНЕ е дека реакцијата на овој прес нема да биде само празна реплика и навреди за раководството на СДСМ, туку дека конечно ќе почнат да даваат одговорен отчет за тоа како навистина се трошат народните пари на нашите граѓани, рече портпаролот на СДСМ на денешната прес-конференција на плоштадот Македонија.