Податоци од јавен карактер од државните институции достапни на интернет

Добивај вести на Viber

На порталот www.otvorenipodatoci.gov.mk, што денеска го промовираше Министерството за информатичко општество и администрација, граѓаните и фирмите ќе можат да добијат слободен и бесплатен пристап до податоци од јавен карактер од неколку државни институции. Пристапот е отворен за сите правни и физички лица, без законски и технички ограничувања, појасни министерот Иво Ивановски. Со овој проект се опфатени податочни сетови од 11 институции: Агенција за катастар на недвижности, Агенција за електронски комуникации, Министерство за животна средина и просторно планирање, Државен инспекторат за труд, Министерство за финансии, Државен пазарен инспекторат, Државен инспекторат за земјоделство, Државен санитарен и здравствен инспекторат, Агенција за финансиска поддршка во земјоделството и руралниот развој, Државен управен инспекторат и Министерство за економија. Граѓаните нема да имаат потреба да доставуваат формулари за пристап до податоци од јавен карактер до институциите, туку ќе можат информациите да ги добијат веднаш на порталот. „Искуството што го има Европската унија со отворањето на податоците покажува фантастични економски параметри, кои со реискористување на податоците од државните институции достигнаа и до 60 милијарди евра во претходната година“, вели Ивановски. Тој најави дека очекува достапните податоци да ги искористи особено приватниот сектор.