ПЕСКОВ ПРИЗНА: Направивме грешки со мобилизацијата, но ќе ги поправиме!

Добивај вести на Viber

Кремљ призна дека биле направени грешки во мобилизирањето на руските резервисти да се борат во Украина, во услови на растечко противење на јавноста.

- Има случаи кога е прекршен декретот - изјави за новинарите Димитриј Песков, портпарол на рускиот претседател Владимир Путин, додавајќи дека „сите грешки ќе бидат поправени“.

Руските и украинските медиуми јавуваат дека наместо воени резервисти, за војната во Украина се повикуваат луѓе без воено искуство - или кои се премногу стари или инвалиди.

Најавата за делумна мобилизација во Русија минатата недела предизвика протести низ целата земја. Министерот за одбрана Сергеј Шојгу тогаш објасни дека ќе бидат повикани 300.000 резервисти, но опозициските медиуми наведоа дека во војна може да бидат повикани до милион луѓе.

Западот и Украина наведуваат дека одлуката на Владимир Путин да прогласи делумна мобилизација е доказ дека ситуацијата на теренот не оди добро за Русија.

Најавата за мобилизација предизвика протести во земјата и масовен егзодус на младите.

На брифингот во понеделникот, портпаролот на Путин, Дмитриј Песков, призна дека се направени грешки и дека во некои региони „гувернерите активно работат на подобрување на ситуацијата“.

Песков, исто така, рече дека не знаел за какви било одлуки за затворање на границите на Русија и воведување воена состојба во земјата. Извештаите во медиумите претходно сугерираа дека ова може да се направи за да се спречи потенцијалните регрути да бегаат во странство, бидејќи многу млади луѓе се обидуваат да ја напуштат земјата.

Во своето соопштение за мобилизација минатата недела, Путин не прецизираше колку резервисти ќе бидат повикани. Но, зборувајќи веднаш по претседателот, Шојгу рече дека 300.000 резервисти - луѓе кои имале воено искуство и им требале специјалистички вештини - ќе бидат регрутирани во редовите. Министерот рече дека тоа е нешто повеќе од 1 отсто од 25 милиони руски воени резерви. Процесот би траел неколку месеци.

Ќе важат одредени ограничувања за возраст и инвалидитет, се вели во уредбата за мобилизација. Се верува дека мажите на возраст од 18 до 60 години - а во некои случаи и постари - би можеле да бидат мобилизирани.

Некои руски коментатори веднаш фрлија сомнеж на ветувањата на претседателот и неговиот министер за одбрана дека повикот ќе биде ограничен. Посочија дека регулативата не кажува ништо за исклучоците, како што е нерегрутирање студенти и оценија дека тоа ќе биде оставено на регионалните раководители да одлучат кого ќе поканат за да се исполнат квотите.

На 24 септември Путин издаде нов декрет во кој конкретно се наведува дека студентите ќе бидат ослободени од воен рок. Пред почетокот на војната во Украина, Русија собрала околу 190.000 војници долж границата.