Пендаровски побара судска разрешница за автобуската несреќа
Објавено во: Македонија 22 Декември, 2021
Претседателот Стево Пендаровски во своето предновогодишно обраќање во Собранието побара судска разрешница за автобуската несреќа во Бугарија во која загинаа 45 лица на враќање од Истанбул.
„Серијата на ужасни трагедии и лични трауми да ја пробудат одговорноста, затоа што нема ништо повредно од губењето на човечкиот живот кога има системски пропусти и прекршени правила.
Меѓу граѓаните владее чувство дека расте културата на неказнивост. Големата автобуска несреќа е само последниот во низата вакви случаи. Доколку ваквите случаи не добијат завршница во разумен рок, недовербата на граѓаните ќе расте.
Миграцијата не е предизвикана само од егзистенцијални причини, туку и од квалитетот на животот, односно одат онаму каде што има правда“, рече Пендаровски.
Тој се осврна и на односите со Бугарија и блокадата од соседот на евроинтеграциите на земјата.
„Една теза е дека спроведуваме системска дебугаризација, што е сериозно обвинување. Акцентот на сегашните односи да го пренесеме од минатото во сегашноста. Коридорот 8 никогаш не стана конкурентен на Коридорот 10“, спомена меѓудругото Пендаровски.
Дестабилизација не е можна, но можно е демократско уназадување и авторитарно владеење, предупреди Пендаровски за можноста дека блокадата временски би можела да потрае.
Пендаровски додаде дека за над 20 проценти за само две години бележи пад поддршката на евроинтеграцијата од страна на граѓаните.
- Очекувам новата влада час поскоро да се насочи кон реалните проблеми со пандемијата и енергетиката, наведе претседателот.
Ја поздрави и одлуката за оставка на премиерот Зоран Заев како демократски чин.
- Тоа е неспорен чин што треба да се поздрави. Сакале или не, политиката е дел од напшите животи, но никогаш не смее да стане се во нашите животи, порача Пендаровски.
Шефот на државата побара департизацијата на безбедносните служби и на армијата.
- Ќе мора да се определат или за едното, или за другото, рече тој.