Партиски препукувања и нов оглас за студентско сместување

Добивај вести на Viber

Објавен е новиот конкурс за сместување на студентите во студентските домови бидејќи слободни останале 3106 кревети, Како што информираше министерството за образование, речиси половина од студентите кои поднеле барање за кревет во државен студентски дом, биле одбиени поради доставување лажни податоци. Место има во десет домови, а студентите ќе се пријавуваат до 6 септември.  Примени во државните домови се 2.147 студенти, покажаа резултатите синоќа објавени на веб сајтот на министерството кој се блокираше поради големиот број посети. Според министерот Спиро Ристовски, одбиени се тие што не ги исполнувале условите, немале целосна документација или имале лажни податоци за финансиската состојба на семејството што било проверено преку  Управата за јавни приходи. „ Во законски утврдениот рок 4.799 студенти аплицирале електронски. Од нив 3.740 имаат приложено документи, при што Комисијата утврди дека речиси 43 проценти од апликациите се со неточни податоци, односно не се идентични со податоците во доставената документација“, изјави Ристовски кој уште еднаш повтори дека ќе има засилени контроли за тоа кој ќе земе кревет во студентските домови и драконски казни за раководителите кои нема да ги почитуваат законите, високи и до 15 илјади евра. Партиско-младински препукувања Проблемите со студентското сместување на почетокот на оваа академска година ги скараа партиски подмладоци. Од социјал-демократската младина побараа власта да го реши хаосот во домовите. Според нив за прв пат не е објавена прелиминарна листа по кои критериуми се примени идните станари во домовите. Од подмладокот на ВМРО-ДПМНЕ пак остро преку соопштение реагираа за ваквите обвинувања. „СДММ можеби треба да даде одговор дали е поправично лице кое што доаѓа од семејство со годишен приход од 1,4 милиони денари, да биде сместено пред лице чие семејство користи социјална помош? Ако оваа практика тие ја применувале, повеќе нема да може да се толерира!Ако веќе СДММ сака да говори за студентскиот стандард треба да каже какви беа условите за сместување во студентските домови во нивно време, колку нови легла обезбедија и колку средства се одвојуваа за студентски стипендии“, соопштуваат од УМС на ВМРО-ДПМНЕ.