Падот на лирата им донесе незаслужен статус, Турците стануваат „милионери“ на хартија
Објавено во: Економија 06 Јули, 2018
Околу 18 илјади Турци станале нови милионери откако вредноста на турската национална валута достигна рекордно ниско ниво, информира „Хуриет дејли њуз”. Падот на лирата носи инфлација, па според тоа се зголемува и богатството на хартија кај турските државјани.
Бројот на турски милионери се зголемил во последните пет месеци од 138.980 на 156.866 со падот на лирата, покажуваат податоците на Агенцијата за банкарска контрола и регулација.
Турските милионери во земјата и во странство имаат вкупно 1,37 трилиони турски лири. Од нив 141.753 живеат во Турција, а 15.133 во странство. Просечно на секој од турските милионери му припаѓаат по над шест милиони лири.
Годишната инфлација во Турција се зголеми над 15 проценти во минатиот месец, првпат по околу 15 години, напомнува весникот. Турската лира, истовремено, загуби речиси 20 отсто од својата вредност во однос на доларот оваа година.