Отписот на долговите почнува од утре – еве како да аплицирате

Добивај вести на Viber

Од утре започнува да тече рокот за пријавување на граѓаните - потенцијални корисници на владината мерка за еднократен отпис на долговите. Согласно јавниот повик што го објави Министерството за финансии, право на отпис на долговите имаат граѓаните кои припаѓаат на следните категории: - корисник на социјална парична помош - корисник на постојана парична помош или - невработен подолго од 12 месеци, а доколку сте во брак и Вашиот брачен другар да е невработен Притоа тие мора да ги исполнуваат следните услови: - да сте пријавени во Агенција за вработување на РМ и активно барате работа, - заедно со брачниот другар не сте оствариле приходи поголеми од 105.600 денари во 2013 година и - не поседувате друг имот освен оној во кој живеете, или Право на отпис на долговите имаат и лица кои западнале во финансиски тешкотии поради сопствен инвалидитет или тешка болест, или поради инвалидитет или болест на брачниот другар или смрт на брачниот другар и не можеле да ги плаќате долговите. Како тешка болест во оваа категорија се подразбираат малигни и церебрално васкуларни заболувања. За овие лица услов е: - инвалидитетот, болеста или смртта да настанала во периодот од 1 јануари 2009 година до 31 декември 2013 година, - во 2013 година заедно со брачниот другар не сте оствариле приходи поголеми од 105.600 денари и - заедно со брачниот другар не поседувате друг имот освен оној во кој живеете. Лицата кои ги исполнуваат овие услови треба своите барања да ги достават до Центрите за социјална работа во местото каде што живеат и притоа да ги достават следните документи: - копија од Вашата лична карта, а ако сте во брак и од личната карта на брачниот другар; - извод од матична книга на венчани - писмена согласност од Вас и од Вашиот брачен другар (доколку сте во брак) за обезбедување податоци за вашиот статус и долг од надлежните институции и доверителите. Образецот за писмената согласност ќе ви биде даден во Центарот за социјална работа. Исто така, зависно од причината поради која барате отпис на долговите, треба да ги имате и овие документи: - ако сте лице кое поради смрт на брачниот другар не може да ги плаќа долговите, задолжително доставете извод од матична книга на умрени за брачниот другар - ако сте лице со потешко заболување или потешка болест на брачниот другар, задолжително доставете медицинска документација од која може да се утврди дијагнозата и датумот кога е дијагностицирана болеста; - ако Вашиот долг е за искористена електрична или топлинска енергија, задолжително доставете копија од последната фактура/сметка за електрична или топлинска енергија.