ОСМАНИ ПО ОБВИНУВАЊАТА НА МИЛОШОСКИ: Ова е дел од таа фабрика на лажни вести во ВМРО-ДПМНЕ
Објавено во: Македонија 09 Април, 2024
Во однос на важноста на пасошите и движењето со нив, претседателскиот кандидат и шефот на дипломатијата, Бујар Османи одговори на обвинувањата на ВМРО-ДПМНЕ и рече дека тие шират лажни вести.
Османи денеска ги демантираше и ги оцени како лажни вести обвинувањата од опозицијата дека наводно скрил важен документ од ЕК потпишан од 25 нивни членки освен од Грција и Франција дека до септември ќе не пуштаат со старите документи.
„Не е точно. Ова е дел од таа фабрика на лажни вести што ја открија во ВМРО-ДПМНЕ. Знаете дека создале фабрика за пропаганда и лажни вести и тоа е дел од таа фабрика, која што мислам дека наредните денови повеќе и повеќе ќе се разоткрие. Во однос на пасошите засега не се проблем европските земји. Проблем е што МВР го има сменето Законот и ги има декларирано нашите пасоши за неважечки и граѓаните не може да ја напуштат нашата граница. Така што ние воопшто не сме стигнале до проблемот со границата на земјите од ЕУ. Граѓаните со наши пасоши не можат да ја напуштат нашата граница бидејќи од нашите закони се декларирани како неважечки. Додека за враќање ние ги имаме направено и преземено сите мерки никој да нема пречка да се врати. И јас досега не сум слушнал дека некој граѓанин не успеал да се врати во државата бидејќи не можел да помине низ земји членки на ЕУ“, вели Османи.
Според него, МВР треба да каже зошто уште е спор процесот на издавање пасоши и при тоа ја повтори неговата понуда да помогнат за да се забрза тој процес на издвање нови документи со новото уставно име.
Тој додава дека тоа што можеше да се смени во однос на личните документи е веќе сменето во однос на возачките дозволи и личните карти, додека за пасошите, вели, тоа е прашање кое што значи директно кршење на Договорот од Преспа и на Уставот. Потребна е како што вели реорганизација за издавање пасоши на граѓаните, за што е подготвен да помогне и да ја прекине и кампањата.
Пратеникот од ВМРО-ДПМНЕ, Антонио Милошоски на неговиот Фејсбук профил, објави допис од италијанското МВР дека 25 членки на ЕУ донеле одлука да се дозволи слободно движење со валидни пасоши со името Република Македонија до крајот на септември 2024 година.