Орка холдинг: Нема полициска акција, компанијата Монт е чиста

Добивај вести на Viber

Нема полициска акција, туку контрола од двајца инспектори на МВР на кои им се доставени потребните документи и кои потврдија дека нема ништо спорно во работењето на компанијата, известија попладневно од компанијата Монт, дел од Орка холдинг. Некои медиуми јавуваа за полициска акција во фирмата на Орце Камчев поврзана со финансирањето на ВМРО-ДПМНЕ за последните претседателски избори. 

„Најостро и со целосна одговорност ги демантираме денешните сензационалистички и неточни информации за полициска акција во фирмата Монт, која е дел од Орка Холдингот на Јордан Камчев. Не станува збор за полициска акција, туку за контрола од стана на двајца инспектори од МВР, на кои им се доставени потребните документи и кои потврдија дека нема ништо спорно во работењето на компанијата. Ние ја поздравуваме инспекцијата затоа што тоа е во насока конечно да се расчисти политичката и медиумска хајка која се води против приватните компании во Македонија, стои во соопштението од Орка холдинг.

Додаваат дека со овие информации им се прави штета на угледот на приватните компании

„Ниту компанијата Монт, ниту Орка Холдинг на било каков начин имаат учествувано во предизборната кампања на Гордана Сиљановска на претходните претседателски избори. Маиците од компанијата Монт која работи во областа на текстилната индустрија беа нарачани и набавени единствено на страната на Polyesterday-компанија со која ние имаме долгогодишна соработка, а која во случајов е наш должник и станува збор за долг за кој веќе имаме испратено опомена пред тужба до должникот. Со понатамошните активности на Polyesterday по набавката на маиците не сме никако поврзани ниту навлегуваме во истото, стои во соопштението.

Велат дека изнесувањето на информациите во јавноста на овој начин е пример за класична инсинуација, нешто со кое се прават обиди во јавноста да се наруши угледот и името на нивните брендови. 

А.Т.