Од денеска термални камери на скопскиот аеродром
Објавено во: Македонија 27 Јануари, 2020
Од денеска ќе се скенираат со термална камера патниците на летовите од Истанбул и Дубаи на скопскиот аеродором, кои имаат врска со регионот во Кина каде е жариштето на корона вирусот. Ваква одлука претходно донесе Комисијата за заразни болести.
– Комисијата за заразни болести, по повод новите препораки на Светската здравствена организација за ширењето на корона вирус, кој веќе има епицентар во Вухан заклучи дека нема простор за паника. Ние немаме директна комуникација и директни летови со овој регион, тоа значи дека луѓето кои би дошле евентуално од таму се веќе неколкупати скенирани на другите аеродорми. Ние ќе преземеме мерки на превенција и веќе од утре за летови од Истанбул и Дубаи, кои имаат врска со овој регион во Кина, патниците ќе се скенираат со термална камера – изјави вчера министерот за здравство Венко Филипче.
Како што извести министерот, скопскиот аеродром согласно последните евалуации е оценет на највисоко ниво и ги задоволува највисоките стандарди на детекција, рано препознавање и рана изолација доколку кај пацинетите потенцијални заразени се најдат вакви симптоми.
На аеродромот ќе бидат активирани и лекарски екипи кои ќе прават преглед. Членовите на комисијата најавија дека оние со сомнителни симптоми ќе минат низ строги протоколи за преглед и надзор, велат епидемиолозите. Филипче додаде дека станува збор за вирус што дава многу слични симпотми на грипот.
- Може да помине со лесна средна форма, но и тешки форми како што еве веќе предизвикаа смрт кај пациенти забоелни од овој вирус. Потенцирам дека тоа се пациенти кои се постари со намален имунитет и пациенти што имаат хронични заболувања – додаде тој.
Комисијата за заразни болести појасни дека кај оние кај кои ќе се покаже сомнение на повисока температура ќе имаат посебен третман, односно екипа од аеродромот ќе ги интервјуира во заштитна облека дали доаѓаат од Вухан или околината и доколку се покаже дека имаат било какава симптоматологија ќе бидат тргнати во изолација.