Објавени многу тајни документи на Националната агенција за безбедност
Објавено во: Свет 17 Мај, 2016
Многу тајни документи на поранешниот службеник на американската Национална агенција за безбедност, Едвард Сноуден ќе станат „отворена книга“ за новинарите и организациите.
Сајтот Интерсепт, кој го покрена новинарот Глен Гринвлад, упати повик до новинарите да работат со нив и целосно да ја истражат архивата на Сноуден. Интерсепт објави десетици документи на НСА, меѓу кои и оние кои се однесуваат на методите на испитување затвореници во Гвантанамо. Се наведува дека НСА имала лице за врски, кое било одговорно за одржување секојдневен контакт со оние, кои ги испитувале затворениците, за да ги процени и искористи нивните информации. Гринвалд бил дел од тимот, кој прв го интервјуирал Сноуден во 2013 година.
„Од почетокот имавме став да соработуваме со странски и други американски медиуми, а не целиот материјал да го задржиме само за себе. Има многу документи, кои се од јавен интерес и кои можат и треба да бидат објавени. Постојат и документи во архивата за кои сметаме дека не треба да бидат објавени, бидејќи можат да им нанесат голема штета на невини луѓе“- рече Гринвалд.
Тој додаде дека Интерсепт ги поделил документи со дваесетина медиуми и новинарски тимови од повеќе земји, меѓу кои и со „Вашингтон пост“, „Њујорк тајмс“, „Пропаблик“ и „Гардијан“.