Обама: Грчката криза нема да влијае на светските финансии
Објавено во: Свет 30 Јуни, 2015
Американскиот претседател Барак Обама предупредил дека растечката Грчка финансиска криза може да има „значителен ефект“ на европскиот раст, но нема да го погоди светскиот систем.
Обама изјавил дека ситуацијата во Грција, која е на работ на неисполнување на своите долгови, е „од суштинско значење“, но нема да предизивка голем шок во светските финансии.
Во меѓувреме „Standard and Poor's“ го намали кредитниот рејтинг на четирите грчки банки до „селективен банкрот“ по изрекувањето на лимити за влечење и странски трансфери.
„Намалувањето на рејтингот следува веднаш по мерките воведени од грчката влада, вклучувајќи ги ограничувања за влечење на депозитите, затворање на филијали на банки за една целосна работна недела, како и забраната на дознака надвор од Грција, освен со дозвола од Министерството за финансии на Грција“, соопшти рејтинг агенцијата во соопштението.
Банките ќе останат затворени до 6 јули, како дел од мерките на Владата за заштита на банкарскиот систем од колапс, откако Европската централна банка (ЕЦБ) ја замрзна финансиската поддршка потребна за обезбедување на ликвидноста на грчките банки.
Од Министерството за финансии повторно потврдија дека банкарските депозити ќе бидат непроменети и по неделниот референдум за прифаќање на условите на спасувачката програма предложена од кредиторите на Грција.