Ни недостигаат дури 536 пожарникари, најголем дел од возилата се од минатиот век
Објавено во: Македонија 17 Февруари, 2020
На 30-те единици на противпожарна заштита во земјава им недостигаат вкупно 536 пожарникари за да имаат барем толку вработени колку што е законски пропишаниот минимум, констатирал Центарот за граѓански комуникации во своето последно истражување.
Само четири од 30 единици имаат повеќе пожарникари од законскиот минимум (и тоа само по еден или двајца), додека шест единици имаат колку минимумот.
Најмногу пожарникари, повеќе од 200, му недостигаат на Скопје. Следуваат Тетово, каде недостигаат 65 пожарникари и Гостивар со 52 пожарникари помалку од законски предвидените. Во Куманово недостигаат 49 пожарникари, во Битола има кусок од 32, а во соседен Прилеп од 26 пожарникари.
Кога станува збор за возилата, противпожарните единици располагаат вкупно со 241 возило, каде спаѓаат не само возилата за гасење пожар и цистерните за вода, туку и сите други возила на противпожарните екипи.
Просечната старост на возилата е 28 години и 68 отсто од нив се од минатиот век.
-За разлика од противпожарните возила, според истражувањето на возилата на министерствата и општините, просечната старост на овие возила е е 12,5 години.