„Недела неработен ден“ оди на Влада следната седмица; сепак некој ќе оди на работа
Објавено во: Македонија 02 Декември, 2020
На наредната владина седница наверојатно ќе се разгледа предлог законското решение за недела да биде неработен ден. До тогаш се очекува Министерството за труд и социјална политика (МТСП) да го достави предлогот до Влада па да биде разгледуван. Портпаролот на Владата Муамет Хоџа денеска на прес конференција рече дека помина повеќе време од првично најавеното за ова законско решение заради тоа што биле правени дополнителни консултации со приватниот сектор, со коморите, но и со ресорните министерства.
„Очекуваме консултациите да завршат набрзо и предлогот за недела неработен ден да биде на владината седница наредната недела. Штом предлогот биде доставен до Владата, ќе се разгледа. Ќе се земат предвид сите предлози, сите сугестии што доаѓаат од приватниот сектор, од коморите и предлогот ќе биде доставен до Владата, рече Хоџа.
И од Министерството за економија неделава потврдија дека нема да има промени во законите за трговија на мало, за угостителство и за туристичка дејност, односно овие дејности ќе продолжат да работат како и досега и во недела. Сепак, Законот за трговија ќе претрпи одредени измени, кој ќе се однесуваат на трговијата на големо, односно на големите магацини или маркети.
„За туристичките агенции и за угостителите најверојатно ќе остане постојното решение до средината на наредната година, а за Законот за трговија се прават неколку опции, посебно за трговијата на големо каде што ќе има одредени измени, но тие нема да се случат веднаш зашто треба да бидат информирани сите бизниси во земјава. Секако, треба првично да бидат информирани и во соработка со стопанските комори да се донесат такви решенија, изјави министерот за економија Крешник Бектеши.