НАТО денеска одлучува за „Исламска држава“
Објавено во: Свет 28 Јули, 2015
Претставници на земјите-членки на НАТО ќе разговараат на вонредна средба денеска во текот на денот за нови акции против терористичката организација „Исламска држава“.
Седницата на амбасадорско ниво во штабот на воениот сојузник во Брисел започнува на пладне по локално време. Тaa билa свиканa по барање на Турција, откако бомбаш-самоубиец се разнесе во пограничниот град Суруч и уби 32 лица. Анкара тврди дека нападот е дело на „ИД“.
Турција побара свикување на Северноатлантскиот совет на НАТО, за да ги информира своите сојузници за операциите кои ги презела против тероризмот, се вели во официјалното соопштение на турското Министерство за надворешни работи.
Премиерот Ахмед Давудоглу ја обвини групата „Исламска држава“ за нападот во Суруч, при што на 20 јули загинаа 32 цивили. Уште пред „ИД“ да ја презеде одговорноста, турската армија бомбардираше за првпат позиции на организацијата во соседна Сирија и им овозможи на САД да отворат воената база во Иджирлик oд каде ќе полетуваат американските бомбардери од коалицијата против терористите.
На денешната средба на 28-те претставници во НАТО се очекува да биде претставен нов план за тампон зоната во Сирија по должината на турската граница.
Досега инсистирањето на Анкара за зона на забранети летови беше да се одбиваат за правни причини и поради стравувањата дека тоа може да доведе до слабеење на режимот на сирискиот претседател Башар ал Асад.
Многу од пограничните сириски области се контролираат од „ИД“ и слична операција би имала за цел нејзино отстранување.
Според запознаените за ова нема да се организира во форма на официјална воена операција на НАТО, имајќи ја предвид политиката на Алијансата да не нападне суверени држави без дозвола од Советот за безбедност на ОН.
За да ја добие поддршката на барем дел од сојузниците, кои се вклучени во коалицијата против Исламската држава, Турција денеска треба да објасни и за напаѓањето на позициите на курдските бунтовници од „ПКК“ во Сирија. Владата ги смета за терористи, додека САД и ЕУ ги гледаат Курдите како сојузник во војната со „ИД“.