НАДЕЖТА НЕ УМИРА ТАКА ЛЕСНО КАЈ МЕРКЕЛ: Канцеларката очекува датум за Македонија во мај
Објавено во: Македонија 17 Јануари, 2020
Германската канцеларка Ангела Меркел изразила надеж дека Македонија и Албанија ќе добијат датум за пристапни преговори со ЕУ на самитот во Загреб во мај.
Меркел, како што пренесоа дел од медиумите , тоа го истакнала на билатералната средба со хрватскиот премиер Андреј Пленковиќ, чија земја во прво полугодие претседава со Советот на ЕУ.
-Самитот за Западен Балкан кој во мај годинава ќе се одржи во главниот хрватски град е многу важна работа за Македонија. Се надевам дека таму ќе биде постигнат напредок-рекла Меркел.
Самитот на ЕУ за Западен Балкан е планирано да биде одржан на 5 и 6 мај оваа година во Загреб.
Европските лидери кон крајот на октомври ја одложија одлуката за доделување датум за пристапни преговори со Македонија и Албанија.
Таквата одлука на ЕУ доведе до распишување предвремени избори во земјава кои ќе се одржат на 12 април.