Модуларни болници во 16 градови: Што има во нив
Објавено во: Македонија 05 Декември, 2020
Денеска во Гевгелија започна поставувањето на модуларната болница, а во текот на следната недела монтажа на објектите ќе започне во Струмица, Куманово, Струга и Кичево, информира Министерството за здравство. Оттаму велат дека во сите општини забрзано се работи на активностите за реализација на проектот.
„Интензивно се работи на подготовки на терен, се расчистуваат локациите, локалните јавни претпријатија обезбедуваат приклучоци, стручните служби на единиците на локална самоуправа даваат максимална поддршка за што поскора реализација на проектот од Светската банка. Општината Битола и јавните претпријатија го уредуваат просторот и го подготвуваат теренот за поставување на три модуларни болници со капацитет од 100 болнички кревети и три тријажни центри. Во моментов, во Битола се бетонираат бетонските подлоги за поставување на модуларните болници, стои во соопштението.
Информираат дека во Штип теренот е подготвен за бетонирање на подлогата, инсталациите се донесени до точките за приклучни места. Денеска во Струга завршува бетонирањето на бетонската подлога, а сите инсталации се спроведени. Со забрзана динамика се работи на теренот во Гостивар, Кичево, Прилеп и Кавадарци. Во Кочани теренот е спремен и ќе започне бетонирање на подлогата.
Во Дебар и Тетово во тек се припремните работи.
Општина Охрид започнала со расчистување на теренот и забрзано работи на обезбедување на пристапни патеки и спроведување на инсталации. На сите 16 локации се работело истовремено.
Крајните рокови за пуштање во употреба на сите модуларни ковид центри истекуваат за три месеци. Но, како ќе завршува монтажата, така ќе пристига и потребната опрема и инвентар за целосно опремување, што ќе значи и сукцесивно пуштање во употреба.
Секој регионален ковид центар ќе има приемен и тријажен оддел, целосно опремена лабараторија, целосно опремени болнички соби и сите други помошни простории за персонал и пациенти.