Милошоски го предаде аудио-материјалот: Обвинителството да го повика Заев
Објавено во: Македонија 19 Февруари, 2020
Поранешниот пратеник Антонио Милошоски ги достави снимените материјали од неименуван укажувач до Обвинителството за организиран криминал и корупција, за кои тврди дека во него е гласот на претседателот на СДСМ, Зоран Заев. Според поранешниот министер за надворешни работи, Заев искажувал тенденции да му се помогне на обвинетиот во случајот „Рекет“, Бојан Јовановски, во работењето на „Меѓународниот сојуз“.
Станува збор за материјалот што тој го објави на седницата на Комисијата за надворешна политика, односно аудио записот. Според Милошовски, материјалот предизвикува сомневања дека поранешниот премиер Зоран Заев долго време знаел за финансирањето на Меѓународниот сојуз и помогнал во финансирање на 1ТВ.
„Според мене, би било добро Обвинителството да го повика господинот Зоран Заев да даде изјава за овој материјал, каде тој е клучен соговорник“, рече Милошоски.
Пратеникот од опозициската ВМРО-ДПМНЕ, Антонио Милошоски денеска имаше средба со обвинителката Вилма Рускоска во Обвинителството за организиран криминал и корупција на која и ги предаде аудио записите кои ги објавуваше на собраниската Комисија за европски прашања.
Милошоски кажа дека дал само еден разговор, оној од Комисијата, а од Основното јавно обвинителство за гонење на организиран криминал и корупција веднаш објавија дека ќе биде донесена понатамошна одлука што ќе се прави со материјалот.
„На средбата Милошоски достави аудио материјал за кој по преслушувањето и анализа на истиот ќе биде донесена јавнообвинителска одлука за понатамошно користење на материјалот“, соопштија од обвинителството.