Медведев го задржува оптимизмот за “Турски поток”
Објавено во: Свет 24 Јули, 2015
И покрај сите стравувања во последните денови за крајот на "Турски поток" премиерот на Русија Дмитриј Медведев уште не го изгубил својот оптимизам за реализација на проектот, пишува руската новинска агенција "Новости".
Тој коментира дека очекува потпишување на договор меѓу Турција и Русија за изградба на гасоводот. Плановите предвидуваат поставување на цевки по дното на Црното Море, кои ќе излезат на турскиот брег.
Во полн обем гасоводот ќе биде со четири цевки - една за турските клиенти на "Гаспром", а останатите три - за европските. Цевките за Европа мора да поминат низ турската територија до гасен центар со грчката граница.
Пред неколку дена министерот за енергија на Турција Танер Јилдиз коментира дека Москва ја смета неговата земја само како транзит рута и тоа не и се допаѓа на Анкара.
"Овој проект (" Турски поток ") е безусловна алтернатива на" Јужен поток "и во таква ситуација ние гледаме со оптимизам на овој проект", вели сепак Медведев.
Во меѓувреме почетокот на изградбата на проектот беше одложуван неколку пати, а во почетокот на месецот "Гаспром" го раскина договорот со италијанската Saipem која треба да ги мести цевките по дното на Црното Море.