Маж во Гвинеја почина од вирус сличен на ебола, СЗО бара брзо да се запре ширењето

Добивај вести на Viber

Здравствените власти во Гвинеја го потврдиле првиот случај на исклучително смртоносен вирус Марбург, што е сличен на ебола. Ова го потврдија од Светската здравствена организација. 

Пациентот е лекуван во локалната болница кога неговата состојба одеднаш се влошила, по што тој починал. Во моментов се работи на пронаоѓање на неговите контакти во делот на земјата кон границата со Либерија и Брегот на Слоновата Коска со цел да се запре ширењето на вирусот.

„Вирусот Марбург има голем потенцијал за ширење, што значи дека мора да го запреме што е можно поскоро“, изјави регионалниот директор на СЗО за Африка, Матсидисо Моети.

Првиот случај во Гвинеја беше потврден минатата недела, само два месеци откако земјата прогласи крај на епидемијата на ебола, од која годинава починаа 12 луѓе.

Првпат Марбург е идентификуван во Западна Африка, а од 1967 година од овој вирус имало 12 големи епидемии, претежно во Јужна и Источна Африка. Стапката на смртност од Марбург варираше од 24 до 88 проценти во минатите епидемии, во зависност од видот на вирусот и управувањето со кризи.

Вирусот се пренесува преку крв и секрети. По инкубацијата, која може да трае до шест дена, болеста започнува со висока температура, болки во мускулите и општа слабост, што доведува до големо оштетување на органите и е со честа смртност. 

Над 200 луѓе починале од појавата на вирусот Марбург во Ангола во 2005 година, пишува Би-би-си.

foto AP